Sunday, January 10, 2010

زيارتي الممتعة لـcraft land

Posted by miia at 1:40 AM 6 comments

والله اني وايد متحمسة اكتب عن هالزيارة ولو ماكنت مصدعة ورادة من برا الساعة 2 الفير ولا كنت كتب عن الموضوع على طول، والسبب الأساسي ان ريلي خش اللابتوب عني وفصل النت يدري عن ادماني وحماسي الوقت كله في الدرب وانا ارمس عن الموضوع،،،،

قبل لا اكتب اخص بالشكر واللي كانت السبب اني ازور المكان لأختي اللي توني متعرفة عليها، الأخت mayya من سلطنة عمان صاحبة مدونة ، فحبيت اني ألبي امنيتها بزيارة هذا المحل واللي اهدي لها هذا الموضوع كعرفان لجميلها…

بسم الله نبدأ،،،

أول ما وصلت المحل في down town في الجميرا ، انبهرت بشكله من الخارج، وللعلم ان المحل توه صارله 3 اشهر فاتح، لأني متعودة اتغدا في الاوبرج واعرف كل اللي موجود في هاك المركز، وما جد شفت هالمحل،،،

 

وبعدها سرت وكلمت العاملات اني اصور علشان احطه في مدونتي فكلموا صاحبة المحل مدام السيدة جينفر، واللي كلمتها شخصيا في التليفون وخبرتها بنيتي في التصوير لصالح مدونتي ورحبت بالفكرة وطلبت منها ايميلها عسب اطرشلها الرابط…

وهني بديت التصوير، ومن يوقفني عاد :)

للعلم هالمحل ينظم دورات للـquilt والكروشيه…

 

هني اول ما اتدشين المحل وعرض للمنتجات الجديدة

عارضين في المحل اقمشة قطنية للـquilting ومكاين الخياطة المعروفة شرات brother و pfaf ومكاين خياطة بعد، وازف بشرى للي عندهن مكاين بروذر ان المحل بعد فترة بيوفرون قطع الغيارات مثل الاقدام foots الخاصة بالكشكشة وطويات التنظيف المختلفة الخ الخ….

هني هالكورنر فيه اوراق الباترون المسطر والفازلين بأنواعه الخاص بالتضريب والترقيع والتطريز

هني طانات الاقمشة اللي تخبلت عليهن للعلم المتر عندهم بـ30 درهم….

هني ستاند للبييه بأنواع وحتى بأدوات صنع البييه اللي ما خليت مكان ما دورت عليه ومالقيته الا اون لاين فوايد استانست يوم شفته،،،

هني ركن الشرايط وشكلهن لذيذ،،،مو لذيذ اكل،،، لذيذ متعة للعيون،،، ما اعرف كيف اشرح يمكن اللي اتموت في الشرايط تفهمني…:)

وهني هالدفاتر الملونة اللي تكحل عينج يوم اتشوفينهن…

تشكيلة من مختلف الابر

هني المقصات المدورة والكترات

مجلات خاصة بالكروشيه نسيت اتصفحهن، المرة الياية ان شاءالله===> هذا اذا طاع ريلي يوديني…باتعرفون السبب عقب…

آآآآآآآآآآآآآآآآآآآآه، ييت على العوق، شو تتوقعون هذا…انزلوا تحت

 

 

 

تعالوا….

 

 

 

 

 

زراير، خبااااااااااااالي…..

هذا جانب من المحل

تحته مكتبة خاصة بتعليم الكروشيه والترقيع

هني المساطر، اللي ما تخيلت الاقيهن اي مكان في الدولة لأني يأست وكنت ناوية اسويلهن اوردر…من كل حجم وشكل ولون وغرض

صورة اقرب

هني عاده شغلات الكروشيه والخيوط اللي تخبلت عليهن ولو اني مالي فيهن

جانب من المحل

هني عجبتني شكل الخيوط

هني الجانب اللي ما خزت منه، مكتبة طانات القطع الوان واشكال اتخبل

هني كولكشن محبي التطريز بأنواعه، الشرايط والحرير…

صور اقرب

هني الاشغال الجاهزة وباتروناتها

هني وهم يقصن القطع لي…

هني وين مكابس الزراير الحديد المتنوعة

هذول القطع اللي تنقيتهن

وهذا جانب من اغراضي

هذا مثال للتطريز بالشرايط

وهذا السبب اللي يخلي ريلي ما اييبني هني مرة ثانية :)

هذي جيسة اغراضي

وهذي اغراضي بعزقتهن اول ما ييت البيت

القطع

القطع الصغار للترقيع

مكبس الزراير واداة البييه

شرايط الريكراك

الزراير كان ودي اغرف لو ما غلاتهن الحبة اتييج لى 6 او 8 دراهم

باترون فاضي مسطر،،،،

الانطباع الاخير للمحل…

المحل مميز بأغراضه يعني ما تلقون شي عنده موجود برا، مثل الباترون الفاضي المسطر، المساطر المختلفة، أدوات البييه والزرار المختلفة، هو غالي حبتين لكن تدفعين وقلبج بارد، بدل ما اتسوين اوردر لأمازون صكي هالدرب واشتري من عندهم ووفري عليج تكافة التحويل والبريد…

وقريبا بيوفرون باترونات للملابس وورش عمل ودورات لخياطة الملابس، هنيالكن يا بنات دبي طبعا والمحل مثل ما قلت صارله 3 اشهر مفتوح وكل ماله يزدهر كونه مثل هالنوع من التجارة غير متوفر عندنا بكثرة وصار عليه طلب اكثر من قبل…وان شاءالله عما قريب بيسوون تجارة الكترونية عن طريق محلهم لتسهيل البيع والشراء منه خصوصا بداخل الامارات والخليج عموما…

المحل ما عليه كلام وينصح وبشدة لزيارته خصوصا المدمنات منكن…وفي النهاية، هذا موقعهم لكافة التفاصيل http://www.mycraftland.com فيه كل تفاصيل الدورات والورش، والسيدة جينفر صاحبة المحل سيدة طيوبة وحبوبة,,, وشوفكن المرة القادمة ادعولي اوصل برنينا كل ما وصلت القى المحل مسكر،…

Thursday, January 7, 2010

لوحة ملاحظاتج،،،بلمساتج

Posted by miia at 2:20 AM 0 comments

أنأ أموت في لوحة الملاحظات، او wall board من صغري،،، كان خاطري اقتني واحدة اللي اتيي بالدبابيس بس أمي كانت مو راضية اتييبها بسبب الدبابيس بس والله عذرتها الحينة فديتها من يبت العيال،،، فديت أمي والله يحفظهتا لي…

الموووووهيييييم…

شو المقادير،،،

حدايد بالمغناطيس، شريتهن من أيكيا وبخمس دراهم الحديدة الواحدة…، كرتونة عادية بس سميكة اشوي، وقماش ملون وشرايط سادة أو العكس قماش سادة وشرايط ملونة والباجي عاد من ابداعج…

العوامل المساعدة صمغ شمع، ودبابيس للتثبيت…

1.تأكدي من ان القماش مكواي عدل، ولفيها كأنج اتجلدين او تغلفين هدية وثبتيها بالدبابيس، وبعدها صمغي تحت القماش عسب لا يتزحزح ويثبت

2.من الامام حطي الشرايط وصمغي

3.بعدها ييبي الحدايد، اييج عن كل حديدة برغيين و3 مغناطيست التثبيت.

وهذا شكله قبل لا انركب الحدايد

4.ثبتي الحديدة وين تبينها في الكرتونة

5.ثبتي البراغي، وسكريها من وراء الكرتونة.

 

6.وهذا العمل النهائي، وبالهناء والشفاء، اقصد هالله هالله في المعلقات :)

بالأمكان اتركبين عليها تعليقة في الخلف، وثبتينها وين تبين، أنا هذي سويتها علشان تثبت مخطوطات الخياطة مالي واللي عرضته في الموضوع السابق وباسوي واحدة لماميـ وبوجابر ولدي…

يالله راوونا ابداعاتكم…

ملاحظة: السموحة على التصوير من اييب كاميرا بروفـ بابدّع ان شاءالله…

 

ع miia © Baby Shop is Designed by Ipietoon Sponsored by Emocutez | تعريب وتطوير : حـسـن