Sunday, October 11, 2009

بطاقة ماميـ لمدرساتها بمناسبة العودة للمدارس

Posted by miia at 9:28 AM 0 comments

تعجبني سوالف يوم الام توجب مدرسات بنتها،،، افتقد

هالشي زمان لكن كنت اشوف من بعيد بعض الامهات

وشغلاتهم لمدرساتنا ويرمسون البنات بينهن البين ليما

تستوي البنية هذي مميزة لأن أهلها يهتمون بكل كبيرة

وصغيرة في حياة بنتها ولا ننسى البنت نفسها...

هاك اليوم جمعت العدة...عسب اسويلها البطاقة وتعالوا

اراويكم التفاصيل...

يبت لوحة بنفسجية وظروف خضراء من مجرودي

قصي الكرتونة بطريقة تناسب البطاقة ومقاسها وتأكدي كل مرة

لما تتأكدين من المقاساتـ،،، توكلي على

الله وقصي الكرت

هذا شكل الكرت

الحين المرحلة الثانية من العمل واللي هو محتاج شوية رسم...

هني رسم مخطط صغيرون لمريول بنتي

وبعدها طبقته على ورق ملون بلون شبيه من لون مريول

ماميـ

ورسمت قميص المريول وقصصتهم…

هذا شكل القميص بعض التضبيطات ويناسب شكل

قميص بنتي…طبعا تنظينه وتمسحين بقايا القلم

الرصاص في المريول والقميص

ونرجع لبطاقتنا

اتييبين شريط الزجزاج او اسمه ric rac

بالصمغ خطي من اول الزاوية لي الزاوي المقابلة على شكل

قوس او نص دائرة

وبعدها اتثبتين الشريطة بشكل مقوس على البطاقة

تييبين قطاعة ورق على شكل نجمة واتقصينها شرات لي في

الصورة واتثبتين 4 كل اثنين مع بعض…وأذا ما عندكم

قطاعة عادي قصي على شكل Vباتعرفون بعد شوي

(القطاعة ممكن تشترونها من المكاتب الكبرى انا شارتنها

من المكتبة اللي موجودة الخالدية مول الطابق الثاني)

وبعدين اتييبين اللزق بو وجهين واتقطين منهن قطع اتحطين

واحدة وراء القميص وواحدة وراء المريول

وبعدين اتفجين اللصق واتثبتينه على الكرت تحت النجمتين

بحيث يبين جنه معلق بتعليقة ثياب الغسيل

بعدها اتييبين قطاعة ورق على شكل ورق شجر…اتقصين

منهن واتنثرينهن حول حبل الغسيل

وتكتبين داخل الكرت كلماتج واتحطين لمساتج

الساحرة…وانتهينا….

وهذي المجموعة اللي اشتغلت عليها…مع لمساتي

الخاصة،،،

Monday, September 28, 2009

يوم الاساور العالمي....

Posted by miia at 12:35 AM 1 comments
تحيدون الخرزات اللي اشتريتهم من سوق مرشد في موضوعي السابق...

اشتغلنا عليهن انا وبنتي "ماميـ" على قولتهم Mother daughter craft وكان يوم حافل بشغل الاساور...

اترككم مع الصور...

هني نجبت الخرز كله...


هني بو عبدالله ولدي خذ الجيسة وشرد...


وهني miia يالسة اتحسس تقردنّا عسب تشرد حتى هي بالخرز...


وسوتها فديت قلبها...خخخخخخ


الموووهيم...نرجع لموضوعنا الاصلي...

صنفنا الخرزات كل شكل على حدة...

وبعدها يبت اللاستيك،،،وابرة عريضة مالت الاعمال اليدوية....

واترككم مع الصور


















وهذا العمل النهائي عليها

ودمتم،،، later

Friday, September 25, 2009

shopping...shopping...shopping

Posted by miia at 5:33 PM 3 comments
هاك اليوم كنت حاطة اغراض اون لاين على الانتظار بحيث اخذهن واطرش عليهن...بعدين يت فبالي فكرة فلت ليش يا ام رشود استكشفي اسواق الجملة الأول...







كنا حزتها رادين ثالث يوم العيد من ماريمار العقة من دبا الفجيرة مشينا العيال...وانا في السيارة قلت لبو العيال يوصلني السوق...حسيت فخاطره يقول...ما خلصنا....

المهم ووصلني...

لقيت شغلات كثيرة ارخص بكثير من طقطقة الكيبورد...صح اوفر من ناحية التوصيل والمشاووير...لكن اتروم الواحدة تأجرلها سيارة وتسير مع مجموعة صرقعة اسواق او لو فيها على زحمة ومشاويير دبي اتسيير لأةنها مستحيل تنزل الا وهي حاملة ومحمولة بعد هههه

المهم نرجع للشوبينج واراويكم الصور


هذا الـric rac
حلو لملابس البنات واليهال خذت منه الوان وايدة وتخيلوا معاي الاسعار النص الدرزن من هالالوان "اللفة" ينباع ب 15 درهم بس لازم يكون نفس اللون
وانا هني كونها تجربة يديدة ولأنها خذت من كل لون واحد بس فحسبلي اللفة ب 5 دراهم...وكل محل وبيعته وطريقته...


وهذي الشرايط خذتها كلها من عند واحد استغلالي يعرف ان ريلي حاشرني ويبيني اطلع من المحل فباعلي اياها كلها بـ 120 د


هذي الخرزات حبيتها ذكرتني في العلب الكرافت لعمل الاساور مال البنات اشتريتها ب 12 درهم فيها خرزات مكس...


وهذي اشرطة صوفية منوعة خذتها بكمية مع الشغلات الباجية لها ب 450 درهم


وهذا شكل الورود وايد حبيتها وصاحب المحل وايد طيب عطاني اللفة الوردية زيادة من عنده


هذي الدانتيلات اللي على شكل ورد اترومين اتقصينها واترومين اتحطينها عجبتني الالوان وخذتها


هني ورود منوعة شي منها الدانتيل وشي منها الساتان



عجبتني هالورود الساتان وعليها الكرستالات



وهذي شكل الورود من جريب


وهذي اشرطة ستان حسبلي الدرزن منوع بـ24 درهم يعني حساب الحبة بـدرهمين وفوقها لفتين مجانا..."واحنا نشتري المتر بدرهم من محلات مالك وشهيد وشلته"




هذي لفايف الشرايط اللي فيهن زري...روعة...وكيوت


وهذي بعد بس اخف من الاولى وزريهن كيوت
هذول لفتين حلوين عجبوني



وهذول زراير مكس حلوين بعد حبيتهن

ما عطانا فرصة ألف واتشرا...في شغلات حلوة وروعة لقيتها...بس ما مداني اتم...


بغيت اعطي نصيحة للي يشترون عن طريق أمازون والمواقع الثانية ياخذولهم لفة في سوق مرشد صوب اغراض الخياطة...بيدفعون اقل من اللي يدفعونه أون لاين وأفيد لأن بعض المحلات اتكاسرين فيهن او يعطونج شغلات مجانية...

وألقاكم later،،،

 

ع miia © Baby Shop is Designed by Ipietoon Sponsored by Emocutez | تعريب وتطوير : حـسـن