Tuesday, August 12, 2014

بعد الاختفاء، اراضيكم بهالمقلمه الراقيه.. شغلي انا وبنتي

Posted by miia at 11:34 PM 0 comments Links to this post
الصراحه ما اذكر متى اخر مرة دونت، ظنتي حتى الفيورز مالي راحوا ونسوني، ودي ارجع مثل قبل اكتب وادون واشتغل المشكله انشغلت بشغلي وعيالي ودراستي للماجستير غير اني نقات للبيت مافيه غرفه اشتغل فيها، وكومت اغراضي في المخزن، لكن شغفي الوحيد كل شوي يناديني، وان شاء لله ابدا شغل مرتن ثانية... وعلشان اراضيكم اشتغلنا انا وبنتي على هالمقلمة بحطلكم تفاصيل العمل عليها بعدين،،،، انجوي

 

Wednesday, January 26, 2011

spring ladybug، فستان لذيذ وطريقته سهلة,,,,تعالي انسويها مع بعض...الجزء الاول

Posted by miia at 12:21 AM 0 comments Links to this post


من احلى واسهل الدروس خصوصا لمبتدئات الخياطة وتقدرين اتخلصينه في يوم واحد

هالنوعية من الفساتين بالامكان تتفننين فيه، تسوينه للبيت للطلعات حتى ترومين اتسوين منه فستان سهره للاميرات الصغار

سمحولي التصوير معوقني شوي لان الكاميرا البروفشنال ما عرفت تاخذها اختي مني الا الحينة





باسم الله نبدا



الاول اراويكم شكل التصميم على بنتي




القماش خذته من محل طموحة ابوظبي ومادريبها وين الحين بتسوون فيني خير لو دليتوني عليها بها موقع اسمه nanakid بس واقف الحين عسى المانع خير


والقطعة الثانية بولكا دوتس سويت منه بييه

وهذا درس البييه
http://forum.uaewomen.net/showthread.php?t=779377


نبدأ الدرس

نزلي الباترون من هذا الموقع، يعني سوي رايت كليك وسيف، الزر اليمين وحفظ
http://digitalbucket.net/download/e1...2520pieces.pdf

سوي برينت حق الملف بتطلعلج 6 صفحات


قصصي الباترون

جمعيهم في مكانهم الصحيح مثل العاب البازل،

لازم تطلع بهالطريقة


وهذا الباترون مالي


على فكرة الباترون هذا جاي على ثلاث مقاسات
من 2-3
من 4-5
من 6-7


لكن قياس بنتي هو من 7-8 ولاني ما احب البسها شغلات قصيرة كبرت شوي في رسم الباترون باوضحه مع الشرح


اطوي القماش على مثني، والطرف المثني اثبت عليه الباترون نفس في الصورة


هذا هني ثبتت والقماش موجود تحت الباترون ومثبت بالدبوس


هني اراويكم عند راس القلم زودت واحد سم لقياس بنتي والسهم اللي على الزاوية اخر قياس للموديل


هني نهاية الفستان وزودت عليه 7 سم مثل ما قلت علشان جياس بنتي اللي مش موجود في الباترون


في شي نسيت اوضحه، ترا اللي رسمت الباترون ضافت مع الباترون خط الخياطة يعني مافي داعي اتزيدون 2 سم الخياطة يعني بالضبط قصوا على الخط يعني رقم 1 في اخر صورة


هني قصيت قياس بنتي على الخط بالضبط

وهذا شكل الباترون بالقماش

ييبي كربون خاص بالخياطة او الاقمشة، متوفر في اغلبية محلات الكلف او المكتبات، اختاري لون يبين على القماش، وحطيه تحن القماش بالويه، يعني ويه الكربون على القماش بس من اسفل القماش

بهالطريقة، وهذا الكربون وظيفته انه يعلم العلامات اللي سويتيها على القماش من فوق، بس في اسفل القماش، علشان اتكون خياطاتج متناسقة


الحين باي اداة حادة ما تظر القماش خطي فوق العلامات، او حتى بمادة الروليت اللي هي المسننة نفس سجينة البيتزا المدورة بس خاصة بالقماش، انا احب استخدم اقلام التعبئة اللي راسهم بلاستك

هذي العلامة باتشوفينها ان قلبتي القماش، مش واضحة بسبة التصوير لكن حددتها


الحينة خلصنا من باترون الاماكن خلونا انيي لباترون الخلف

خذي نفس الباترون، ومن عند الخط اطوي

بهالطريقة

ونفس الطريقة الاولية، حطيه على قماش مثني
رقم 1 هوالمثني، ورقم 2 القماش المفتوح


لكن من فوق زودي 1 انش نفس الرقم 2، باتعرفوون ليش زودنا عقب
لا تسوين الزيادة رقم 1 لان هذي زيادة قياس بنتي مثل ما وضحت قبل

خلص درس اليوم

علشان الجزء الثاني لازم نجهز الاتي


بييه حول المترين والنص


قطعة قماش صعيرة عرضها 3 سم وطولها 15 سم




واشوفكم في الجزء الثاني 



Thursday, August 5, 2010

نعنشوا في الصيف بديزاين جديد من تصميمي

Posted by miia at 7:42 PM 12 comments Links to this post
هذا موديل جديد اشتغلت فيهن لبناتي


عبارة عن اخضر ليموني جريء، والوان مخططة كيوت


اخليكم مع الصور


هذا التخطيط المسبق للموديلين


فستان الصغيرونة مييا


فستان العودة ماميـ


هذا شكله من تحت

وطبعا ما يكمل اي موديل الا بالاكسسوارات


هذا طوق مامي


وهذي كليبسات مييا

وان شاءالله يكون عجبكم الديزاين

Saturday, July 31, 2010

من طول الغيبات ياب الغنايم،،،،موديل جديد، فكرة جديدة

Posted by miia at 11:04 PM 7 comments Links to this post
ادري صارلي مدة متغيبة لكن كله لظروف الصيف وكنت مشغولة مع كثير من الافكار ودورة التصميم اللي كنت ماخذتها

هذا موديل جديد اشتغلت فيه اول الصيف،،،بس تكسلت اصور وعندي بنت مليقة تتعب من وقفات التصوير ما علينا اخليكم مع الصور

اسم الموديل واللي اقترحته علي مامي هو

Sweet apple

هذا البرين ستورم، يوم كنت احاول اقر على موديل وقياسات ودراسة اقمشة

التنورة

القميص عبارة عن ثلاث طبقات

وهذي صورة جانبية
بنتي لوعت جبدي وماضبطتلي ولا صورة امامية للموديل

اتمنى انه عيبكم

Thursday, May 20, 2010

كليبس للشعر،،،بألوان الفرح

Posted by miia at 4:22 AM 4 comments Links to this post
ألوان الفرح هم لونين عندي، وهاللونين يعبرون عن شخصيتي المتقلبة والمرحة في نفس الوقت الفوشي والليموني

وبمناسبة اعترافي بهالشي :) واعتذارا لي عن انشغالي وتوقفي عن الكتابة والتدوين فترة

أهديكم هذا العمل




Thursday, April 15, 2010

أساور الصداقة، طريقة تعبر فيها بنتج عن نفسها

Posted by miia at 12:33 AM 2 comments Links to this post
if you want to read this post in English click here

كانت بنتي الفترة الاخيرة تواجه مشاكل مع صديقاتها في المدرسة، فأحببت انا وياها اننا نسوي أساور توزعها على صديقاتها، تعبر لهن عن صداقتها وفي نفس الوقت تتباهى بأنها سوتهن وهذا اللي يحبونه البنات عادة، اخليكن مع الصور اللي تعبر عن نفسها

اتقصين الاساور بقماش الجوخ بهالطريقة تقريبا عرض انش ونص والطول حسب دوران المعصم

هني المجموعة اللي بنشتغل عليها
هذي بداية شغلنا

وهذول جزء من المجموعة اللي اشتغلنا عليها

نظرة اقرب

وأقرب اكثر...اشوفكم بعدين

if you want to read this post in English click here

Wednesday, April 7, 2010

معوقات الخياطة المحلية في الدولة، لكننا صامدون الى النهاية

Posted by miia at 1:46 AM 13 comments Links to this post
انا تقريبا صارلي سنه من بديت اتعلم الخياطة، تعليمي كان ذاتي من خلال البحث في النت اكثر شي وفي الكتب...اللي لاحظته من السنة اللي طافت الى الحين شغلات كثيرة تقهر...

نقص مصادر التعليم
يعني مثلا ما شي معاهد للتعليم، كان شي التنمية الاسريه والكثير استفادوا منه لكن سمعت انه سكر من فترة بسيطة، شو السبب ما اعرف خصوصا اني على ما سمعت انه دايما فل
وشي بعد مكان نسيت اسمه لكن ما عليه اعتماد لأن الدورات فيه بالحجز يعني لازم يكتمل عدد معين من الطالبات وبعدها يفتحون دورة
وسمعت ان كلية الخوارزمي تقدر دورة في رسم الباترون والتصميم،،، بس وين الخياطة عسب تكتمل الدورة ما ادري
 

نقص التشجيع...الاعلان...والرعاية
كثير ماشاءالله من المواطنات صارن يمتهنن الخياطة، وبعضهن استقالن بس علشان يتفرغون لحرفه وهوايتهن


بعضهن من كثر الطلبات فتحوا قراجاتهم خياط ويابوا عمال فصاروا يوفقون بين بيوتهن وحرفهن اللي احبوها،،،لكن وين التشجيع...ماشي ابدا

 

يعني مثلا في الخارج شي معارض خاصة لمنتجات السيدات وفي نفس الوقت يتعرفون فيه على بعض ومكونين مثل الجمعيات الخاصة بالهوايات شرات الخياطة والاعمال اليدويه المتنوعة...للعلم انها وظيفة مش مخزية ابدا خصوصا انه وصانا عليه الشيخ زايد وكانوا يمتهنونها اهالينا زمان...وهن مستانسات بعد

 

وعندي تنويه لبعض وليس كل المواطنات، لا تقيدون اعمالكن في الخياطة على وتيرة معينة عسب لا يسري الملل في نفوس الزبائن، غيروا الالوان التصاميم ابحثوا وحاولوا تاخذون افكار من اللي حولكم، كونه العالم صار قرية صغيرة فصارت اغلبية الديزاينات في تشابه الا من بعض الفروق البسيطة اللي لها علاقة بالثقافة

وبعد من ناحية الرعاية، المفروض السيدات بالذات يكون لهن رعاية خاصة في مجال الحرف والاعمال اليدوية، ولمساندتها يجب تخفيف كل التكاليف عليهات خصوصا اذا كانت تشارك في المعارض...يفترض اتكون هناك جهة معينة لتشجعيها، انا سمعت بأن التنمية الاسرية عندها شي مثل هذا القبيل بس مش متأكدة، وأذكر ام ريم الله يعطيها الصحة والعافية يوم قالت انها اتصلت على لجنة خليفة للمشاريع الصغيرة، وخبرتهم بفكرة كافيه خاص بالاعمال اليدوية وانها مصممة ولها خبرة في التجارة وشافت هذا النوع من التجارة في الخارج وملاقي نجاح كبير ردت عليها اللي على التليفون بأنهم ما يقبلون مشاريع الخياييط، اذكر تعليقها على هالأمر يوم قالت حسستني اني بنغالي يبي يفتح خياط هههههه...واتمنى في المستقبل يكون شي ن هالرعاية والله العالم متى

نقص المطبوعات العربية الخاصة بالخياطة والتصميم
وهني اقصد المجلات، الكتب والتصاميم الخاصة بالخياطة، المجلة الوحيدة اللي عرفناها من زمان الي الحينة هي البوردة...


ولا غيرها وهي اما اتيي بطبعة انجليزية او فرنسية، لكن ليش ما تطور المطبوعات بأنها اتخصص مجلات عربية خاصة بالخياطة...

غير المجلات كتب التعليم نفسها كل الكتب العربية المتوفرة، طبعا هذا في حال توفرت اما اتكون قديمة او مش مفيدة او واضحة من ناحية الشرح.


وبعد الباترونات

  

ليش ماشي مصممات عربيات للباترونات، ليش ماشي مطابع تساند تصميم الباترون...من ناحية التقنيات مثلا


ليش ماشي مصانع محلية وعربية لطباعة التصاميم الخاصة في الاقمشة، ليش دائما نقتنع بالجاهز


 ليش ما انصمم أو بالأخص ليش ماشي مصممات للأقمشة عندنا، أكيد السبب ماشي مصانع خاصة بطباعة الاقمشة وهذا اللي انصدمت منه...


 نقص الادوات الهامة للخياطة
حدنا عرفنا البستكي وكمن واحد يبيع كلف وخرز ودانتيلات

  

ليش ماشي ادوات خاصة بالخياطة، ليش ماشي ادوات معينة ما نلقاها الا في الخارج ومع الشحن والتوصيل صار سعره أغلى من المقبول
أو حتى لو كان شي محلات فيها بعض الادوات، لكنها اتورد من الخارج لأن ماشي وكلاء هني والسعر نفس الشي يكون عادة غالي، مثل محل كرافت لاند ياللي زرته قبل اشهر وتكلمت عنه في موضوعي سابق، ونفس الشي محل برنينا وهم نفسهم وكلاء شركة برنينا لمكاين الخياطة

ختاما
الكلام في هذا الموضوع ذو شجون، ولن ينتهي بأذن الله، من نصيحتي ان الاخوات ياللي حابات يتعلمن لا يوقفون عند عدم توفر المعاهد، دوروا في النت واشتروا الكتب 

شي مواقع مفيدة لتعلم الخياطة بالعربي مثل منتدى بنت مفيد واللي فادني وايد وخيطت بسببه اول فستان لي بمساعدة عزيزتي الفاضلة بلووي
وشي بعد مواقع ثانية مثل منتديات مملكة المرأة وشي شخصيات سمعت وشفت مواضيعن المفيدة لكن ما تعرفت عليهن عن قرب شرات ام الكتكوت، صاحبة منتدى ام الكتكوت، وشي منتدى أخر اسمه فتكات بس الموضوع الوحيد اللي حبيته في هالمنتدى موضوع تعلمي الخياطة والتفصيل مع جدة محمد اذكر بأن الموضوع كان ممتع جدا لدرجة اني ما رقدت ليما خلصته، كافي بس اسلوب الكاتبة كان جدا فكاهي

وبعد نصيحة ثاني لخواتي اللي يخيطن ويصممن حالون تنوعن وتحدثن في الاقمشة وفي الخامات، لا يعتمدون على تعلم الخياطة علشان تفصيل العبي ولا جلابيات الدانتيل...يتوسعون ما فيها شي لو اقتبسنا من الغرب المفيد خصوصا ان اغلبية ملابس اطفالنا وملابسنا غربية الوقت الحالي...ما فيها شي لو غيرنا بدل ما نشتري من عند بابوو وراجوو دانتيل وقطع ويل نشتري من النت اقمشة وادوات خياطة لو كانت غالية لكن باترد بالنفع الشخصي لنا

أنا تعرفت على احدى الأخوات المميزات بصراحة، اسمها ام ريم وعندها مدونة رائعة اسمها نانا كيدز

الاخت حالاتي، تعلمت الخياطة من نفسها، بالرغم من وظيفتها كمبرمجة وانشغالها وبناتها الثلاث وظروفها المرضية، لقت وقت تمارس فيه هوايتها

وبصراحة أغبطها لا أحسدها، لأن تمارس هوايتها باستمرار وبدون توقف نوعا ما...وفوق هذا اغلبية مواردها من الخارج من باترونات واقمشة 

وحاليا تتاجر بأقمشة لمصممات كانن يوما من الايام ربات بيوت...وتتابع دائما افكار المصممات خصوصا انها معجبة وبشدة بأفكار المصممة باتي يونج صاحبة مدونة كيد مود بوتيك، فأنا جدا اشكر فيها هذا الاهتمام خصوصا انها اتوفر على الجميع بتوفير الاقمشة بالجملة لبيعها هني في الدولة

والكثير من الاخوات بصراحة تعرفت عليهن وعلى تصاميمهن الجذابة وخياطتهن المتنوعة عن طريق المنتديات والمدونات المختلفة...في نهاية موضوعي باخليكم مع صور لتصاميمهن مع روابط مدوناتهن الشخصية...وادعولي بالتوفيق في دراستي...واشوفكن على خير

تصميم ثلوج الصيف صاحبة مدونة ثلوج الصيف

تصميم ام خليفة وهذا ملفها الشخصي في منتدى سيدات الامارات

 

ع miia © Baby Shop is Designed by Ipietoon Sponsored by Emocutez | تعريب وتطوير : حـسـن