Monday, September 28, 2009

يوم الاساور العالمي....

Posted by miia at 12:35 AM 1 comments
تحيدون الخرزات اللي اشتريتهم من سوق مرشد في موضوعي السابق...

اشتغلنا عليهن انا وبنتي "ماميـ" على قولتهم Mother daughter craft وكان يوم حافل بشغل الاساور...

اترككم مع الصور...

هني نجبت الخرز كله...


هني بو عبدالله ولدي خذ الجيسة وشرد...


وهني miia يالسة اتحسس تقردنّا عسب تشرد حتى هي بالخرز...


وسوتها فديت قلبها...خخخخخخ


الموووهيم...نرجع لموضوعنا الاصلي...

صنفنا الخرزات كل شكل على حدة...

وبعدها يبت اللاستيك،،،وابرة عريضة مالت الاعمال اليدوية....

واترككم مع الصور


















وهذا العمل النهائي عليها

ودمتم،،، later

Friday, September 25, 2009

shopping...shopping...shopping

Posted by miia at 5:33 PM 3 comments
هاك اليوم كنت حاطة اغراض اون لاين على الانتظار بحيث اخذهن واطرش عليهن...بعدين يت فبالي فكرة فلت ليش يا ام رشود استكشفي اسواق الجملة الأول...







كنا حزتها رادين ثالث يوم العيد من ماريمار العقة من دبا الفجيرة مشينا العيال...وانا في السيارة قلت لبو العيال يوصلني السوق...حسيت فخاطره يقول...ما خلصنا....

المهم ووصلني...

لقيت شغلات كثيرة ارخص بكثير من طقطقة الكيبورد...صح اوفر من ناحية التوصيل والمشاووير...لكن اتروم الواحدة تأجرلها سيارة وتسير مع مجموعة صرقعة اسواق او لو فيها على زحمة ومشاويير دبي اتسيير لأةنها مستحيل تنزل الا وهي حاملة ومحمولة بعد هههه

المهم نرجع للشوبينج واراويكم الصور


هذا الـric rac
حلو لملابس البنات واليهال خذت منه الوان وايدة وتخيلوا معاي الاسعار النص الدرزن من هالالوان "اللفة" ينباع ب 15 درهم بس لازم يكون نفس اللون
وانا هني كونها تجربة يديدة ولأنها خذت من كل لون واحد بس فحسبلي اللفة ب 5 دراهم...وكل محل وبيعته وطريقته...


وهذي الشرايط خذتها كلها من عند واحد استغلالي يعرف ان ريلي حاشرني ويبيني اطلع من المحل فباعلي اياها كلها بـ 120 د


هذي الخرزات حبيتها ذكرتني في العلب الكرافت لعمل الاساور مال البنات اشتريتها ب 12 درهم فيها خرزات مكس...


وهذي اشرطة صوفية منوعة خذتها بكمية مع الشغلات الباجية لها ب 450 درهم


وهذا شكل الورود وايد حبيتها وصاحب المحل وايد طيب عطاني اللفة الوردية زيادة من عنده


هذي الدانتيلات اللي على شكل ورد اترومين اتقصينها واترومين اتحطينها عجبتني الالوان وخذتها


هني ورود منوعة شي منها الدانتيل وشي منها الساتان



عجبتني هالورود الساتان وعليها الكرستالات



وهذي شكل الورود من جريب


وهذي اشرطة ستان حسبلي الدرزن منوع بـ24 درهم يعني حساب الحبة بـدرهمين وفوقها لفتين مجانا..."واحنا نشتري المتر بدرهم من محلات مالك وشهيد وشلته"




هذي لفايف الشرايط اللي فيهن زري...روعة...وكيوت


وهذي بعد بس اخف من الاولى وزريهن كيوت
هذول لفتين حلوين عجبوني



وهذول زراير مكس حلوين بعد حبيتهن

ما عطانا فرصة ألف واتشرا...في شغلات حلوة وروعة لقيتها...بس ما مداني اتم...


بغيت اعطي نصيحة للي يشترون عن طريق أمازون والمواقع الثانية ياخذولهم لفة في سوق مرشد صوب اغراض الخياطة...بيدفعون اقل من اللي يدفعونه أون لاين وأفيد لأن بعض المحلات اتكاسرين فيهن او يعطونج شغلات مجانية...

وألقاكم later،،،

جنون الخياطة، الالوان، الاقمشة، والطفولة...

Posted by miia at 4:53 PM 0 comments
قبل سنة كنت في عز ضغوطي، وفي عنفوان مشاكلي الخاصة، وحشرة عيالي...كنت اسمع المقولة اللي تقول "حول الألم الى ابداع" ما كنت اهتم بهالمقولة...لكن يوم بديت اولي حرتي في شي اسمه خياطة...عرفت معناها صح...

النت بحر، دورت الكثير من الدروس والتكتيكات...صار في اوردر يطلع واوردر ينزل...صار في حياة في غرفتي وفي حياتي...والحياة ما اقول بديتها لما عرفت الخياطة...لأ...بديتها لما الخياطة عرفتني وطلعت مني مكنونات همومي فيها...

صارت البداية مكينة، بعدها طاولة، بعدها خيوط وسيرجر و اقمشة واغراض اتدش وتطلع...

وتجارب شي منها زين وشي منها شين يبيله تعديل حتى يكون افضل من الزين...

وتعلمنا التصوير علشان الحماس يكتمل وافرح بثمرات جهدي...وصرنا نتعلم اكسسوارات الملابس لأني ادمان تطقّيم خصوصا ملابس اليهال...وفي النهاية علمت نفسي بنفسي في غمره ضغوطي الدراسية والعائلية وحولت الألم الى ابداع....ومن هنا القاكم طول الوقت واسولف معاكم على طوووول...:)
 

ع miia © Baby Shop is Designed by Ipietoon Sponsored by Emocutez | تعريب وتطوير : حـسـن